Kollecdə payız semestrinin imtahan sessiyasına start verilib.
06.01.2024-cü il tarixindən Astara Pedaqoji Kollecində 2024/2025-ci tədris ilinin payız semestrinin imtahan sessiyasına start verilib. İmtahan sessiyası əyani təhsilalma forması üzrə subbakalavr tədris qrupları üçün 06.01.2025-ci il tarixindən 31.01.2025-ci il tarixinədək Azərbaycan Respublikası Elm və Təhsil Nazirliyinin müvafiq əmrinə əsasən keçirilir.
Kollecin direktoru, professor Kamran Kazımov imtahanların gedişini izləmək məqsədilə bu gün imtahan gedən otaqlara baş çəkib vəziyyətlə əyani tanış olub, tələbələrlə söhbətləşib. Direktor müəllim heyəti ilə görüşü zamanı onları tələbələrin biliyinin obyektiv qiymətləndirilməsi və imtahanlarda şəffaflığın təmin edilməsi üçün bütün imkanlardan maksimum səmərəli istifadə etməyə çağırıb. Kamran Kazımov imtahanlarda tələbələrə və müəllim heyətinə uğurlar arzulayaraq imtahan sessiyasının davam etdiyi müddət ərzində prosesə gündəlik nəzarət edəcəyini bildirib.
Qeyd edək ki, Kolllecdə bütün ixtisaslar üzrə imtahanlar bir növbədə keçirilməklə, saat 09:00-dan 11.30-dək təşkil olunacaq. Xatırladaq ki, bu ildən imtahan nəticələrinin kollecdə ilk dəfə yaradılmış ekollec.az (tələbələr üçün şəxsi kabinet) vasitəsilə tələbələrin şəxsi kabinetlərində operativ yerləşdirilməsi təmin ediləcəkdir.
Sessiya dövründə tələbələrin biliyinin qiymətləndirilməsində şəffaflığı və obyektivliyi təmin etmək, yarana biləcək neqativ halları dərhal aradan qaldırmaq və digər tədbirləri həyata keçirmək məqsədi ilə direktor Kamran Kazımovun sədrlik etdiyi Operativ Qərargah yaradılıb.
Sessiyanın gedişi zamanı imtahanların nəticəsindən yarana biləcək narazılıqların və şikayətlərin operativ olaraq araşdırılması və müvafiq qərar qəbul edilməsi məqsədi ilə yaradılmış Apellyasiya Komissiyası bu gündən fəaliyyətdədir və onlar üçün müvafiqşərait yaradılıb.
Tələbələrin imtahanlara hazırlığının səmərəli təşkili üçün kollecin kitabxanası da gücləndirilmiş iş rejiminə keçirilib. Kitabxana hər gün 08.30-dan 17.30-dək fəaliyyət göstərir.
